CHAN 2020: Amavubi yerekeje i Limbe aherekejwe n’imodoka za gisirikare

Imikino

Ikipe y’Igihugu ‘Amavubi’ iri muri Shampiyona Nyafurika ihuza abakinnyi bakina imbere mu bihugu byabo (CHAN 2020) yavuye i Douala yerekeza i Limbe mu gitondo cyo kuri iki Cyumweru, iherekejwe n’imodoka za gisirikare.

Kuva kuwa 13 Mutarama 2021, Amavubi yabarizwaga mu Mujyi wa Douala muri Cameroun, ahakinira itsinda C rya CHAN 2020 rigizwe n’u Rwanda, Maroc, Uganda na Togo.

Bitewe n’uko imikino isoza amatsinda itangira kuri iki cyumweru, izajya ibera ku masaha amwe, u Rwanda na Togo bizakinira mu Mujyi wa Limbe kuwa Kabiri mu gihe Uganda na Maroc bizaguma i Douala kuri Stade de la Réunification.

Mu gitondo cyo kuri iki Cyumweru nibwo Amavubi na Les Eperviens ya Togo, zombi zafashe urugendo rugana mu Burengerazuba bwa Cameroun, mu Mujyi wa Limbe, ziherekejwe n’abasirikare bo kuzicungira umutekano.

Impamvu z’izi ngabo ni uko mu duce tw’Amajyaruguru y’uburengerazuba n’Amajyepfo y’uburengerazuba muri Cameroun turimo Umujyi wa Limbe, habarizwa imitwe igera kuri 30 (irimo uwa Fako Action Forces) yitwaje intwaro, iharanira ko aka gace kavuga ururimi rw’Icyongereza kigenga.

Muri iki gihe cy’imikino ya CHAN 2020, umutekano wakajijwe muri ako gace dore ko ari naho hakinira itsinda D rigizwe n’amakipe ya Zambia, Guinea, Tanzania na Namibia.

Umukino u Rwanda ruzahuramo na Togo kuwa Kabiri guhera saa tatu z’ijoro, ruzaba rusabwa kuwutsinda kugira ngo rwizere gukomeza muri ¼ nk’uko rwabikoze mu 2016 ubwo rwari rwakiriye iri rushanwa.

Kuri ubu, Ikipe y’Igihugu iri ku mwanya wa gatatu n’amanota abiri, inyuma ya Maroc ifite amanota ane na Togo ifite atatu mu gihe Uganda ifite inota rimwe ku mwanya wa nyuma mu itsinda C.

Abakinnyi b’Amavubi barimo Kwizera, Kimenyi na Bayisenge nyuma yo kugera i Limbe bakoze urugendo rw’amasaha abiri/ Foto: Uwimana Clarisse
Imodoka za gisirikare zaherekeje ikipe y’u Rwanda n’iya Togo kuva i Douala kugera i Limbe kubera umutekano muke uvugwa muri bimwe mu bice bya Cameroun/ Foto: Kayiranga Ephrem

Source: Igihe

Leave a Reply

Your email address will not be published. Required fields are marked *