Coronavirus: Africa y’Epfo yafunze imipaka y’ubutaka

Ubuzima

Perezida Cyril Ramaphosa wa Africa y’Epfo yatangaje ko imipaka yo kubutaka igomba gufungwa kugeza tariki 15 z’ukwezi gutaha, mu muhate wo kugabanya ikwirakwira rya Covid-19.

Mu ijambo yavugiye kuri televiziyo ku wa mbere nijoro, Ramaphosa yavuze ko iki cyorezo ubu ari bwo kiri gukora ibara muri Africa y’Epfo, aho imibare y’abandura yarenze kure iyateganywaga mu nkubiri ya mbere y’iki cyorezo.

Yavuze ko kuva ku munsi wa mbere w’uyu mwaka kugeza ubu hamaze kuboneka abanduye bashya hafi 190,000 kandi ubu hari abantu 15,000 bari mu bitaro kubera Covid-19.

Intara ya KwaZulu Natal niyo ifite abantu benshi banduye mu byumweru bishize, ariko yavuze ko ubwandu mu ntara ya Gauteng buri kwiyongera bikomeye kandi biteganyijwe ko burushaho mu gihe abantu bari kuva mu biruhuko.

Ingamba nyinshi zo kwirinda zafashwe mu kwezi kwa 12 ubu zizongerwa igihe.

Kubuza ubucuruzi bw’inzoga birakomeje, imicanga yo kwidagaduriraho kunyanja irafunze, n’ibikorwa bihuza abantu birabujijwe.

Perezida Ramaphosa yaburiye ko imihangoyo gushyingura ikomeje kuba ahantu benshi bandurira.

Yagize ati: “Gushyingura bimaze kuba umutego w’urupfu ku bantu benshi”, abashishikariza kuguma mu ngo zabo.

Ramaphosa yavuze ko gahunda yo gukingira iki gihugu giteganya izaba ari imwe muri gahunda zikomeye isaba ibikoresho byinshi kandi vuba.

Yavuze ko doze miliyoni 20 bamaze kuzigura kandi zizagera mu gihugu mu mezi ari imbere, ndetse bari kuvugana n’izindi nganda zikora inkingo.

Source: BBC

Leave a Reply

Your email address will not be published. Required fields are marked *