Coronavirus: Kubera ikibazo na AstraZeneca, EU irashaka gukaza ibyo kohereza inkingo mu mahanga

Ubuzima

Umuryango w’ubumwe bw’Uburayi (EU) waburiye ko uzakomeza amategeko yo kohereza mu mahanga inkingo za Covid, ni mu gihe uyu muryango ufitanye icyibazo na AstraZaneca kuko iyi iteganya kugabanya inkingo yari yageneye ibihugu 27 bigize uyu muryango.

Stella Kyriakides, komiseri ushinzwe ubuzima muri EU yavuze ko uyu muryango “uzafata ingamba zose zishoboka mu kurengera abaturage bawo”.

Mu cyumweru gishize, uruganda rw’imiti AstraZaneca rwakoze urukingo, rwabwiye EU ko rutazashobora gutanga inkingo rwari rwemeye kubera ibibazo mu kuzitunganya.

EU yanenzwe kugenda buhoro mu kubona inkingo, uyu muryango ukaba uzigura mu izina ry’ibihugu biwugize.

Amakuru avuga ko AstraZeneca ishobora kuba yaragabanyije 60% ku nkingo yari yemeye gutanga

Mu cyumweru gishize, Tedros Adhanom Ghebreyesus ukuriye Ishami ry’umuryango w’abibumbye rishinzwe ubuzima ku isi (OMS/WHO) yaburiye ko isi iri mu kaga ko “kubura ubumuntu” kubera gucuranwa inkingo za Covid.

Tedros yavuze ko yavuze ko doze zirenga miliyoni 39 z’inkingo zimaze gutangwa mu bihugu 49 bikize – ariko hari igihugu kimwe kiri mu bikennye kimaze kubona dose 25 gusa.

Inkingo ku baturage 100 mu bihugu bimaze gutanga nyinshi ku baturage babyo

Leta z’ibihugu bikize zavuganye/zivugana n’inganda zimaze gukora inkingo kugira ngo zigure izihagije, ibi bitera impungenge umuhate rusange wo kugeza inkingo ku bihugu bikennye.

Gahunda yo gukingira mu bihugu bimwe bigize Uburayi iri kugenda buhoro kuko inkingo inganda zatangaga zagabanutse, ibihugu bimwe binavuga ko bishobora kurega inganda bumvikanye.

Komiseri wa EU yavuze iki?

Madamazera Stella yatangaje kuri Twitter ko ibiganiro na AstraZaneca byabaye kuri uyu wa mbere bitabanyuze kuko nta mpamvu zifatika batanze.

Avuga ko EU yasabye uru ruganda “kubaha gahunda irambuye y’uko ruzabagezaho inkingo”, ibiganiro bindi ngo bizaba kuwa gatatu.

Stella yaburiye ko “ubutaha, kompanyi zose zikora inkingo za Covid-19 muri EU zizajya zibanza kumenyesha mbere mu gihe zishaka kugira izo zohereza mu bindi bihugu”.

AstraZaneca ntacyo iratangaza kumugaragaro ku byavuzwe.

 

Stella Kyriakides

@SKyriakidesEU

Discussions with @AstraZeneca today resulted in dissatisfaction with the lack of clarity and insufficient explanations. EU Member States are united: vaccine developers have societal and contractual responsibilities they need to uphold.

10:42 PM · Jan 25, 2021

1.8K

See the latest COVID-19 information on Twitter

 

Mu cyumweru gishize, AstraZeneca yavuze ko ibibazo mu gukora inkingo bizatuma ingano bari bemeye guha ibihugu bigize EU izagabanuka.

Uru ruganda rwari rwiyemeje gutanga doze miliyoni 80 ku bihugu 27 bigize uwo muryango kugeza mu kwezi kwa gatatu, nk’uko umukozi utatangajwe warwo yabibwiye ibirontaramakuru Reuters.

Abategetsi ntibavuze uko kugabanuka uko kungana, ariko uwo mukozi yabwiye Reuters ko aho kuba doze miliyoni 80 zizagabanuka kugera kuri doze miliyoni 31 – igabanuka rya 60% – mu gihembwe cya mbere cy’uyu mwaka.

Source: BBC

Leave a Reply

Your email address will not be published. Required fields are marked *