Covid-19: Bwa mbere mu Rwanda imibare mishya y’abayandura iri gufata Indi ntera

Ubuzima

Minisiteri y’Ubuzima mu Rwanda (Minisante) yatangaje ko ku wa kabiri taliki ya 22 Kamena, 2021 Habonetse abandi bantu bashya barwaye icyorezo cya Covid-19 bagera kuri 821.

Ni bwo bwa mbere mu Rwanda hagaragaye imibare mishya y’abayandura ingana gutya mu gihe kitarenze amasaha 24(Mu gihe cy’umunsi umwe gusa).

Abarwayi bashya babonetse  mu mujyi wa Kigali 388, i Rubavu habonetse 83, Musanze ni 61, Burera 50, Kamonyi 47, Rutsiro 35, Rwamagana 27, Nyanza 24, Gicumbi 23, Gakenke 23, Muhanga 16, Nyabihu 14, Rurindo 12, Nyamagabe 12, Ngororero 9, Huye 7, Kayonza, Karongi 7, Ruhango 5, Gatsibo 2,Rusizi 2, Ngoma 2, Kirehe 2 na Gisagara 1.

Abarwayi bashya bagaragaye mu bipimo 7.624 byafashwe kuri uyu munsi, ibi byatumye umubare w’abamaze kwandura Covid-19 uba 32.296 mu bipimo 1.564.486 bimaze gufatwa kuva iki cyorezo cyagera mu Rwanda taliki 14 Werurwe 2020.

Minisante kandi  ikomeza ivuga ko abarwayi umunani ari bo bakize COVID-19, abamaze gusezerwa mu bitaro baba 26.712. Abagera ku 5.192 ni bo bari gukurikiranirwa mu ngo zabo mu gihe abandi bari kwitabwaho kwa muganga. Abarembye ni 10.

Kuri uyu wa Kabiri kandi abantu bane barimo abagore babiri b’imyaka 56 na 42 n’abagabo babiri b’imyaka 67 na 52 bitabye Imana bazize icyorezo cya Covid-19 i Kigali, bituma umubare w’abamaze kwicwa n’iki cyorezo ugera kuri 392.

Abantu 247.402 ni bo bamaze guhabwa doze ya kabiri y’urukingo rwa COVID-19 (AstraZeneca) mu gihe abakingiwe bose mu Rwanda ari 391.001.

Ibimenyetso bya COVID-19 birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

 

Photo: (Internet)

 

Leave a Reply

Your email address will not be published. Required fields are marked *