Covid-19: Indege za Gisirikare zifashishijwe mu gukwirakwiza inkingo

Ubuzima

Ku gicamunsi cyo kuri uyu wa kane taliki ya 04 Werurwe, 2021 ni bwo ibikorwa byo gukwirakwiza izo nkingo za Covid-19 mu turere dutandukanye tw’igihugu no mu bitaro bitandukanye hifashishijwe indege za gisirikare zizwi nka kajugujugu mu bice bya kure.

Uretse izi ndege kandi hari no gukoreshwa imodoka mu bice bya hafi, aho zagejeje inkingo za Covid-19 zo mu bwoko bwa Astrazeneka.

Inzego z’ubuzima ziragira inama abaturarwanda yo kutagira impungenge ku guhabwa urukingo rwa covid-19 kuko zizakomeza kubaba hafi.

Ni mu gihe hari bamwe mu baturage bavuga ko batarasobanukirwa neza n’uko urukingo rukora kubera ibihuha biruvugwaho.

Bamwe mu baturage bavuga ko n’ubwo bishimiye kubona izi nkingo nk’imwe mu ntwaro yo guhangana n’icyorezo cya covid-19 bagifite impungenge kubera ibihuha bagiye bumva bizivugwaho, bagasaba ko inzego zubuzima zakomeza kubasobanurura imikorere yazo.

Dr. Twizerimana Jean de Dieu, Umuyobozi mukuru w’ibitaro bya kibirizi umwe mu bari bitabiriye iki gikorwa cyo kwakira izi nkingo, avuga ko nta muntu ukwiye kugira impungenge zo guhabwa urukingo rwa Covid-19, kuko atari we wa mbere waba uruhawe ndetse akavuga ko kandi na nyuma yo gukingirwa izi nzego zizakomeza kuba hafi y’abaturage.

Ati” Icyo nabamaraho impungenge urukingo rujya gusohoka bararugeraje ko nta ngaruka rushobora kugira ku muntu. Rwose ntibagire impungenge zo kuba bahabwa uru rukingo.”

Dr. Twizerimana, akomeza avuga ko u Rwanda kimwe n’ibindi bihugu bicye bya Afurika biri mu bihugu bibonye uru rukingo, ariko hakaba hari n’ibyatangiye kwikingiza, ni ukuvuga ko nta mpungenge bagakwiye kugira.

Mu ntara y’amajyepfo mu karere ka Huye hakiriwe inkingo 5500, Nyaruguru ni 5382, Nyamagabe 5500 Gisagara ni 5500, zose zikaba zizatangira gutangwa ejo kuwa 5 zigatangwa mu gihe cy’amasaha 48 gusa.

Minisiteri y’Ubuzima mu Rwanda (Minisante), ivuga ko amatsinda akurikirana igikorwa cy’ikingira yamaze gutegurwa mu bitaro byose by’uturere. Arimo abakozi bashinzwe gutanga inkingo, abashinzwe gukusanya amakuru y’abakingirwa, abashinzwe ibikoresho ndetse n’abakurikirana ingaruka zaterwa n’urukingo

Minisante, ivuga kandi ko inkingo zikabakaba 347,000 za Covid-19 zakwirakwijwe ku bitaro 50 n’ibigo nderabuzima 508 byo hirya no hino mu gihugu. Gahunda y’ikingira izatangira ku wa gatanu tariki 05/03/2021 ku bitaro n’ibigo nderabuzima bya Leta byose.

Abo mu Karere ka Huye, nabo inkingo zabagezeho
Indege za Kajugujugu za RDF ziri kwifashishwa mu gukwirakwiza inkingo za Covid-19
Akarere ka Nyaruguru nako kagejejweho izi nkingo za Covid-19

Minisante, ivuga ko amatsinda akurikirana igikorwa cy’ikingira yamaze gutegurwa mu bitaro byose by’uturere(Amafoto: Minisante)
(Image: Minisante)

Leave a Reply

Your email address will not be published. Required fields are marked *