Covid: Bwa mbere Israel irohereza doze 5,000 z’inkingo muri Palestina

Ubuzima

Leta ya Israel yatangaje ko igiye kohereza doze 5,000 z’inkingo za Covid-19 zo gukingira abakozi mu by’ubuzima b’Abanyepalestina bari imbere ku rugamba n’iki cyorezo.

Israel ni kimwe mu bihugu biri imbere y’ibindi muri gahunda yo gukingira iki cyorezo ku isi, ariko Abanyapalestina bo muri West Bank na Gaza, higaruriwe na Israel, nta rukingo na rumwe barabona.

Inzobere za UN/ONU zivuga ko Israel ari yo ifite inshingano zo gukingira abantu batuye muri utwo duce twa Palestina tugoswe na Israel.

Israel yo ivuga ko ibyo bitari muri gahunda kandi itigeze ibona ubusabe na bumwe bwa Palestina. Ubu nibwo bwa mbere koherezayo inkingo bigiye kubaho.

Umuhungu w’umunyepalestina ari gupimwa muri Gaza. Gukingira ntabwo ho biratangira

Muri Israel abantu bagera ku 640,000 banduye Covid-19 abandi 4,700 irabica nk’uko bivugwa na kaminuza ya John Hopkins.

Muri Gaza na West Bank handuye abagera ku 160,000 abandi 1,833 bamaze gupfa nk’uko iyo kaminuza y’ubushakashatsi ibyerekana.

Amasezerano adasanzwe ya Israel n’uruganda Pfizer – aho Israel iha amakuru y’ingenzi mu by’ubuvuzi urwo ruganda narwo rugaha iki gihugu inkingo byihuse – yatumye Israel iba igihugu cya mbere kimaze gukingira abantu benshi, ubaze ku mubare w’abaturage, kurusha ibindi ku isi.

Abagera kuri miliyoni 1.7 – ni hafi 20% by’abisiraheli – bamaze kubona doze zombi z’urukingo. Abarenga miliyoni eshatu bamaze kubona doze ya mbere. Kandi iki gihugu kiracyari muri gahunda ya ‘Guma mu rugo’.

Ku cyumweru, ibiro bya minisitiri w’ingabo wa Israel Benny Gantz byemeje ko iki gihugu kiza koherereza inkingo ubutegetsi bwa Palestina. Ubutegetsi bwa Palestina bwo ntacyo buravuga kuri ibi.

Byifashe bite muri Gaza na West Bank?

Haba muri West bank, aho bategekwa by’igice na leta ya Palestina, cyangwa muri Gaza, igenzurwa n’umutwe wa gisirikare wa Hamas, ntaho baratangira gukingira.

Abashinzwe ubuzima muri Palestina bavuga ko bari gushakisha uko babona inkingo, ariko ntibizwi igihe bazatangirira gukingira.

Utu duce twizeye ko tuzabona urukingo muri gahunda ya OMS/WHO ya Covax, yo kugeza inkingo ku bihugu bikennye, igihe cy’iyi gahunda ntabwo kizwi neza.

Muri utwo duce, haheruka kugezwa inkingo ibihumbi zakorewe mu Burusiya ariko ntabizwi aho zagiye.

Abanyepalestina bagera kuri miliyoni 2.7 batuye muri West Bank, naho abagera kuri miliyoni 1.8 baba muri Gaza.

Ni inde ugomba gukingira abanyapalenstina?

Israel ishingira ku masezerano ya Oslo yo mu 1993 na 1995, avuga uburyo Gaza na West Bank zizategekwa mu buryo bw’agateganyo kugeza amasezerano y’amahoro ahoraho agezweho.

Ivuga ko ibyo biha ubutegetsi bwa Palestina inshingano yo kwita ku buzima muri utwo duce, bishingiye ku ngingo y’ubwigenge bwaho.

Palestina ariko ivuga ko ayo masezerano avuga ko Israel igomba gufatanya mu kurwanya ibyorezo n’indwara zandura muri utwo duce.

Inzobere za UN zivuga ko Amasezerano y’i Geneva ku duce twigaruriwe ariyo agomba gushyirwa imbere, bityo leta ya Israel ikagira inshingano yo gukingira Abanyepalestina batuye muri Gaza na West Bank, nk’uko ikingira abaturage bayo.

Gahunda yihuse cyane yo gukingira muri Israel iragera no ku barabu b’abisiraheli bahatuye hamwe n’abanyepalestina baba mu gace kometswe kuri Israel kari mu burasirazuba bwa Yeruzalemu.

Kuwa gatanu, OMS/WHO yaburiye ku “kwikubira inkingo kw’ibihugu” ivuga ko “hari akaga ko igikoresho cyari gufasha kurangiza icyorezo – inkingo – gishobora kurushaho kuzambya” ubusumbane ku isi.

Source: BBC

Leave a Reply

Your email address will not be published. Required fields are marked *