Covid: Kenya ivuga ko izemera gusa imfashanyo y’inkingo zisigaje ibyumweru 8 ngo zite agaciro

Ubuzima

Kenya ivuga ko izemera gusa inkingo zisigaje ibyumweru birenga umunani ngo zite agaciro, mu gihe ibihugu bikize bitangiye gutanga imfashanyo y’inkingo za Covid z’umurengera bifite biziha Afurika.

Leta ya Kenya ivuga ko ibi bizatuma igira igihe gihagije cyo kuzitanga.

Dr Mercy Mwangangi wo muri minisiteri y’ubuzima ya Kenya yavuze ko iki gihugu kizajya cyemera imfashanyo y’inkingo zisigaje nibura ibyumweru umunani ngo zite agaciro.

Yabivuze ubwo yakiraga imfashanyo ya doze zirenga 400,000 z’urukingo rwa AstraZeneca zatanzwe n’Ubwongereza.

Mu baturage barenga miliyoni 50 batuye Kenya, abagera kuri miliyoni 1.8 gusa ni bo bamaze gukingirwa

Iyo mpungenge iriho mu gihe ibihugu bifite inkingo za Covid z’umurengera bidakoresha byatangiye kuzisaranganya n’ibihugu bicyennye.

Izo nkingo Kenya yakiriye ku wa gatandatu zitanzwe n’Ubwongereza, zifite igihe cyo kugeza mu kwezi kwa cyenda mbere yuko zita agaciro.

Kandi mu gihe muri Kenya hitezwe kugera izindi nkingo mu byumweru bicye biri imbere, iki gihugu ubu kiravuga ko kigiye gutangira guha doze ya mbere abatarayihabwa.

Mu baturage barenga miliyoni 50 batuye Kenya, abagera kuri miliyoni 1.8 gusa ni bo bamaze gukingirwa.

Muri bo abagera hafi ku 700,000 bahawe doze zombi z’urukingo.

Ibihugu bitandukanye muri Afurika byabaye ngombwa ko bijugunya doze zirenga 450,000 zatanzwe n’ibihugu by’amahanga kubera ko zari zisigaje igihe gito ngo zite agaciro kandi zigatinda kubigeraho.

Src: BBC

Leave a Reply

Your email address will not be published. Required fields are marked *