Covid: Ralph Gonsalves yatewe ibuye mu mutwe mu myigaragambyo yo kwamagana inking

Ubuzima

Minisitiri w’intebe w’igihugu kigizwe n’ibirwa cya St Vincent and the Grenadines (Saint-Vincent-et-les-Grenadines) cyo mu karere ka Caraïbes (Caribbean) yajyanwe mu bitaro nyuma yuko akomerekejwe mu myigaragambyo yo kwamagana gahunda y’ikingira.

Ralph Gonsalves, umutegetsi mukuru w’iki gihugu, yari arimo kugenda n’amaguru mu mbaga y’abantu hanze y’inteko ishingamategeko ubwo bivugwa ko yaterwaga ibuye mu mutwe.

Amafoto agaragaza Minisitiri w’intebe avirirana ubwo yihutishwaga akurwa aho byabereye.

Minisitiri w’imari yavuze ko babigiriwemo inama n’abaganga, yoherejwe ku bitaro byo mu gihugu cya Barbados cyo muri ako karere ngo anyuzwe mu cyuma (MRI scan), nkuko bitangazwa n’ibiro ntaramakuru Reuters.

Iyo myigaragambyo yari yateranye ku wa kane bamagana gahunda yo gusaba ko benshi mu bakozi bo mu rwego rw’ubuvuzi bakora imirimo ituma bagira ibyago byinshi byo kwandura bakingirwa Covid-19.

Amakuru avuga ko amabuye n’amacupa y’amazi yajugunywe muri iyo myigaragambyo.

Ibiro bya Minisitiri w’intebe byabwiye Reuters ko uwo mugabo w’imyaka 74 yakubiswe n'”igiterwa mu kirere”. Ibinyamakuru byaho bivuga ko icyo ari ibuye.

Igihugu cya St Vincent and the Grenadines, kiri mu gice cy’amajyepfo cya Caraïbes, kigizwe n’ibirwa (amazinga mu Kirundi) birenga 32.

Kuva iki cyorezo cyatangira, iki gihugu gituwe n’abaturage bagera ku 110,000 kimaze gutangaza abanduye coronavirus bagera ku 2,298 n’abo yishe 12, nkuko bigaragazwa n’imibare ya Kaminuza ya Johns Hopkins yo muri Amerika.

Kimaze gukingira byuzuye abaturage bagera hafi ku 9%, nkuko iyo Kaminuz ibivuga.

Ubukerarugendo bw’iki gihugu bwashegeshwe bikomeye n’iki cyorezo, no mu kwezi kwa kane abaturage babarirwa mu bihumbi byabaye ngombwa ko bata ingo zabo kubera iruka ry’ikirunga.

Src: BBC

Leave a Reply

Your email address will not be published. Required fields are marked *