Covid: WHO ivuga ko inkingo zirimo gushira mu bihugu bicyennye

Ubuzima

Ibihugu bicyennye byinshi bibona inkingo binyuze muri gahunda yo kuzisaranganya ku isi ntabwo bifite doze zihagije zo gukomeza ibikorwa by’ikingira, nkuko bivugwa n’ishami ry’umuryango w’abibumbye ryita ku buzima (OMS/WHO).

Umujyanama mukuru muri OMS Dr Bruce Aylward yavuze ko iyo gahunda yo gusaranganya inkingo hagati y’ibihugu bikize n’ibicyennye izwi nka Covax, imaze gutanga doze miliyoni 90 z’inkingo za Covid-19 mu bihugu 131.

Ariko yavuze ko zitaragera ku rwego rw’izihagije zo kurinda abaturage iyi virusi igikomeje gukwirakwira ku isi.

Uku kubura kw’inkingo zihagije kubaye mu gihe ibihugu bimwe muri Afurika bihanganye n’inkubiri ya gatatu y’ubwandu bwa coronavirus.

Ibihugu bimwe ntabwo bifite inkingo za Covid-19 zihagije zatuma bikomeza gukingira

Ku wa mbere, Perezida w’Afurika y’epfo Cyril Ramaphosa yasabye ko kwirundaho inkingo kw’ibihugu bikize guhagarara, mu gihe leta ye irimo kugorwa no guhagarika kwiyongera gukomeye k’ubwandu bushya.

Ku rwego rw’umugabane w’Afurika, doze miliyoni 40 gusa ni zo zimaze guterwa abantu – ku baturage batageze kuri 2%, nkuko Bwana Ramaphosa yabivuze.

Mu gucyemura ibi, yavuze ko leta ye irimo gukorana na gahunda ya Covax mu gushyira muri Afurika y’epfo ikigo cyajya gikorerwamo inkingo nyinshi kurushaho muri ako karere.

Ahandi hateganywa gushyirwa ikigo nk’icyo ni mu Rwanda no muri Senegal. Nigeria na yo irimo gutekerezwaho.

Covax yashinzwe mu mwaka ushize ngo itume doze z’inkingo za Covid-19 zigera ku isi hose, ibihugu bikize bikarihira ibicyennye igice kimwe cy’ikiguzi cy’izo nkingo.

Iyi gahunda ya Covax iyobowe na OMS n’indi miryango mpuzamahanga. Mbere, yari yihaye intego yo gutanga doze miliyari ebyiri z’inkingo za Covid-19 ku isi bitarenze impera y’uyu mwaka wa 2021.

Nyinshi muri izo doze zirimo guhabwa ibihugu bicyennye, aho Covax yizeye gutanga izihagije zarinda nibura 20% by’abaturage.

Ariko, gutanga izi nkingo byakomwe mu nkokora n’icyerererwa ryagiye ribaho mu kuzikora n’ibibazo mu kuzikwirakwiza, bituma habaho kutagira izihagije mu bihugu bicungira gusa ku nkingo zitangwa na Covax.

Uganda, Zimbabwe, Bangladesh na Trinidad and Tobago ni bimwe mu bihugu mu minsi ishize byatangaje ko inkingo zirimo kubishirana.

Ibihugu bimwe bihanganye n’inkubiri y’ubwandu bwa gatatu bwa Covid-19 mu gihe inkingo zirimo kubishirana

Mu kiganiro cya OMS i Genève (Geneva) mu Busuwisi ku wa mbere, Dr Aylward yemeye ko hari ikibazo gikomeye cy’inkingo zidahagije.

Mu bihugu bicyennye 80 biri muri gahunda ya Covax, “nibura kimwe cya kabiri cyabyo kuri ubu ntabwo bifite inkingo zihagije zo gutuma bikomeza gukingira”, nkuko Dr Aylward yabivuze.

Ati: “Turebye ku byo tubwirwa n’ibihugu buri munsi, ibihugu birenga kimwe cya kabiri byashiriwe n’inkingo mu bubiko ndetse birimo gusaba izindi nkingo. Ariko mu by’ukuri birashoboka ko biri hejuru cyane kurushaho”.

Yavuze ko ibihugu bimwe byari byagerageje gushakisha ubundi buryo bwo gucyemura ikibazo cy’inkingo zidahagije, byirengera ingaruka zikomeye, biriha igiciro kirenze ku cyemewe ku isoko ry’inkingo.

Mu gihe iboneka ry’inkingo rikomeje kuba ikibazo, ibihugu bimwe bikize bifite doze zo ku ruhande biri mu muhate wo kongera imfashanyo y’inkingo bitanga muri gahunda ya Covax ndetse n’ubundi buryo.

Imfashanyo y’inkingo

Ku wa mbere, ubutegetsi bwa Perezida w’Amerika Joe Biden bwatangaje uko buteganya gutanga imfashanyo ya doze miliyoni 55 z’inkingo ku bihugu bizicyeneye.

Muri izo doze, doze miliyoni 41 zizashyirwa muri Covax, izindi miliyoni 14 zisigaye zisaranganywe mu bihugu bifatwa nk’ibizicyeneye mu buryo bwihutirwa cyane.

Izi nkingo ntabwo ziri muri doze miliyoni 500 Perezida Biden yemeye ko Amerika izatanga muri Covax. Iyi mfashanyo yayemeye mu nama y’ibihugu bya G7 yabaye mu ntangiriro y’uku kwezi.

Byose hamwe, ibihugu bya G7 byemeye gutanga imfashanyo ya doze miliyari imwe y’inkingo ku bihugu bicyennye muri uyu mwaka.

Ariko impirimbanyi zanenze iyo mfashanyo yemewe n’ibyo bihugu.

Zivuga ko nta ntego igaragaza, igenda gahoro cyane kandi yerekana ukuntu ibihugu by’i Burayi n’Amerika bidashishikariye kurandura iki cyorezo cya mbere kibi kibayeho mu rwego rw’ubuvuzi muri iyi myaka 100 ishize.

Zimwe mu nzobere mu buvuzi zivuga ko bishobora gufata amezi – niba ahubwo atari imyaka – mbere yuko abantu bahagije bakingirwa ku isi ngo bitangazwe ko iki cyorezo kirangiye.

Ubwo ku wa mbere yari abajijwe ku itangwa ry’inkingo, Jen Psaki ushinzwe gutangaza amakuru mu biro bya perezida w’Amerika, yagize ati:

“Icyo twasanze ari ingorane ikomeye mu by’ukuri isi ugutanga inkingo, dufite doze nyinshi zo gusaranganya n’isi, ahubwo ni ingorane ikomeye ijyanye n’imikorere n’ibikoresho”.

Src: BBC

Leave a Reply

Your email address will not be published. Required fields are marked *