Ethiopia – Tigray: PAM/WFP ivuga ko noneho yashoboye kuhageza imfashanyo

Ubukungu

 Ishami ry’umuryango w’abibumbye ryita ku biribwa (PAM/WFP) rivuga ko amakamyo yaryo arenga 12 noneho yabashije kugeza imfashanyo yihutirwa mu murwa mukuru Mekelle w’akarere ka Tigray kabayemo intambara mu majyaruguru y’igihugu.

Izo modoka zari zimaze igihe zarabuze uko ziva mu karere ka Afar bihana imbibi kubera impungenge ku mutekano muri ako karere, nyuma yuko mu kwezi gushize hagabwe igitero ku makamyo atwaye imfashanyo.

Iyi mfashanyo yageze i Mekelle, igiye kugoboka abantu babarirwa mu bihumbi kuri ubu bugarijwe n’inzara.

Imirwano hagati y’ingabo za leta ya Ethiopia n’inyeshyamba zo muri Tigray yashyize igihugu mu makuba

Umunyamakuru wa BBC Kalkidan Yibeltal uri mu murwa mukuru Addis Ababa wa Ethiopia, avuga ko iyi mfashanyo yihutirwa yitezweho kunganira abantu babarirwa muri miliyoni eshanu bo muri Tigray, ubu batunzwe n’imfashanyo iva hanze kubera intambara yahadutse mu mwaka ushize.

Mbere yaho, ONU yari yaburiye ko hacyenewe gufatwa ingamba zihutirwa kugira ngo hirindwe inzara muri Tigray, aho abantu batari munsi ya 400,000 babayeho mu nzara yo ku rwego rukomeye.

Hari impungenge ko aya makuba yo muri Ethiopia yafata indi ntera, mu gihe hari kwiyongera imirwano mu turere tumwe na tumwe hagati y’inyeshyamba zo mu mutwe wa Tigray People’s Liberation Front (TPLF), ubu zirwanira mu mutwe uhuriwemo n’abandi barwanyi bo muri Tigray, wa Tigray Defence Forces (TDF).

Leta ya Ethiopia na TPLF buri ruhande rushinja urundi kwenyegeza iyi mirwano.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa mu kwezi kwa cumi na kumwe mu 2020.

Leta ya Ethiopia ivuga ko TPLF ari umutwe w’iterabwoba, mu gihe inyeshyamba za TPLF zo zivuga ko ari zo leta y’akarere ka Tigray yemewe n’amategeko.

Src: BBC

Leave a Reply

Your email address will not be published. Required fields are marked *