Huye: Abantu 26 bafatiwe mu tubari barenze ku mabwiriza yo kwirinda Covid-19

Ubuzima

Ku mugoroba wo ku wa Gatatu tariki 17 Gashyantare 2021, abantu bagera kuri 26 bafatiwe mu tubari tune two mu Karere ka Huye bari kunywa inzoga barenze ku mabwiriza yo kwirinda icyorezo cya Covid-19.

Bafashwe ku bufatanye n’ubuyobozi bw’umurenge wa Ngoma bufatanyije na Polisi, Dasso ndetse na Youth Volunteers bafashe abagera kuri 26 barimo banywa inzoga mu tubari kuri ayo manywa.

Ubuyobozi bw’akarere ka Huye bwatangaje ko aba 26 bafashwe, bafatiwe mu tubari  4 dutandukanye. Utu tubari tukaba twahise dufungwa naho abafashwe bahise bakurikiranwa bajyanwa guhabwa ibihano.

Ni kenshi hirya no hino mu gihugu, hakunze kumvikana abantu barenze ku mabwiriza yo kwirinda icyorezo cya Covid-19 kikibasiye isi muri iyi minsi aho bamwe bafatirwa mu tubari, abizihiza isabukuru y’amavuko n’ibindi. Ibi bikaba ari bimwe mu bitiza umurindi ikwirakwira ry’iki cyorezo.

Kuva iki cyorezo cyagera mu  Rwanda, kugeza taliki ya 17 Gashyantare, 2021, umubare w’abamaze kwicwa n’icyorezo cya Covid-19 ugera kuri 243 mu gihe abamaze kucyandura bo bagera ku 17 716.

Mu Rwanda kandi hamaze gufatwa ibipimo bya Covid-19 bigera kuri 960 001, hasanzwemo abantu banduye bagera 17 716. Muri bo 15 918 basezerewe mu bitaro nyuma yo gupimwa bagasangwa nta bwandu bagifite,  mu gihe 1555 bakiri kwitabwaho.

Mu gukomeza kwirinda ikwirakwira kw’icyorezo cya Covid-19, abaturarwanda bose basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Bamwe mu bafashwe bahawe ibihano naho utubari basanzwemo turafungwa

 

Kamwe mu tubari bafatiwemo

Leave a Reply

Your email address will not be published. Required fields are marked *