India – Covid: I Delhi barasaba kongera aho gutwikira imirambo irimo kwiyongera

Ubuzima

Polisi y’umurwa mukuru w’Ubuhinde Delhi yasabye abategetsi baho kongera ahantu ho gutwikira imirambo y’abishwe na Covid-19.

Inkubiri ya kabiri ya coronavirus ikomereye ibice bimwe by’Ubuhinde, aho ibitaro, ahantu hashyirwa abapfuye n’aho batwikira imirambo (crematoriums) byarengewe.

Umubare wose w’abanduye Covid mu Buhinde warenze miliyoni 18, ubwo ejo ku wa kane habaruwe abashya 386,452 banduye – umubare munini cyane wigeze uboneka ku munsi muri iki gihugu.

Abamaze gupfa nabo biyongereyeho abantu 3,500 bapfuye ejo ku wa kane, harimo ab’i Delhi honyine hahise hagira umubare munini w’abapfuye ku munsi umwe, hafi 400.

Guverinoma ivuga ko ntacyo itari gukora mu guhangana n’ikibazo mu gihe kuyinenga biri kwiyongera

Umwuka wa Oxygen n’ibitanda mu bitaro bikomeje kuba bicye cyane, abantu bakomeje gutakamba ku mbuga nkoranyambaga ngo bafashwe.

Umwe mu bapolisi bakuru mu murwa wa Delhi yavuze ko abantu bari kujya gutwikira imirambo y’ababo muri ‘crematoriums’ zitagenewe abishwe na Covid.

“Ni yo mpamvu dusaba ngo hongerwe izindi ‘crematoriums'”, nk’uko yabitangarije NDTV.

Kunenga uko Guverinoma y’Ubuhinde yitwaye muri iki kibazo biri kwiyongera, cyane ku kuba yaremeye ko habaho kwiyamamaza mu matora n’ibikorane binini by’abasenga.

Ariko minisitiri w’ubuzima ku wa kane yarengeye guverinoma, avuga ko igipimo cy’abapfa mu Buhinde ari cyo gito cyane ku isi kandi ‘oxygen’ iri gutangwa ‘bihagije’.

Harsh Vardhan yabwiye ibiro ntaramakuru ANI ko oxygen ubu “iri kuva ahantu henshi” harimo no mu mahanga, ndetse bari gutegura n’uburyo bwo kuyihunika.

Inkunga y’ibikoresho ivuye muri Amerika ubu yageze mu Buhinde, irimo ibikoresho bigera hafi kuri miliyoni imwe byo gupima Covid mu buryo bwihuse, n’udupfukamunwa 100,000 two mu bwoko bwa N95.

Oxygen n’ibitanda mu bitaro bikomeje kuba bicyeya, abantu bakomeje nabo gutabariza ababo barwaye ku mbuga nkoranyambaga. Umugore uri kwihanganishwa ku bitaro nyuma y’uko se atemerewe kwakirwa mu bitaro

Abahanga bavuga ko kwikingiza na ‘lockdown’ ari yo nzira yonyine ihari.

Ku wa gatandatu, abantu bose barengeje imyaka 18 mu Buhinde bazaba bemerewe gukingirwa. Ariko nubwo Ubuhinde ari cyo gihugu gikora inkingo nyinshi ku isi, ntabwo bufite izihagije zakingira abantu bagera kuri miliyoni 800 bazaba bashobora gukingirwa kuva ejo.

Mu kwezi gushize, iki gihugu cyahagaritse ibikorwa byo kohereza mu mahanga inkingo gikora.

Leta zimwe mu zigize Ubuhinde ubu ziravuga ko inkingo zababanye iyanga.

Umujyi wa Mumbai, umurwa mukuru w’imari w’Ubuhinde, utuwe n’abarenga miliyoni 20, wahagaritse gukingira mu minsi itatu kubera “kugabanuka kw’inkingo”, nk’uko abashinzwe ubuzima babivuze.

Komiseri w’umujyi wa Mumbai, Ashwini Bhide, yatangaje kuri Twitter ko inkingo zisigaye ubu bazihariye gusa abantu barengeje imyaka 45.

Source: BBC

Leave a Reply

Your email address will not be published. Required fields are marked *