Indonesia: Indege itwara abantu ya Boeing 737 yaburiwe irengero hashije umwanya muto ihagurutse

Ubuzima

Indege yari irimo abantu bagera 62 yaburiwe irengero, ubwo hari hashije umwanya muto ihagurutse ivuye mu murwa mukuru wa Indonesia, Jakarta.

 

Ubuyobozi buvuga ko iyo ndege ya Boeing 737 ya kompanyi Sriwijaya Air yaburiwe irengero mu gihe yari mu nzira igana mu gace ka Pontianak gaherereye mu ntara y’uburengerazuba bwa Kalimantan.

Urubuga rukurikirana indege rwitwa Flightradar24.com rwavuze ko indege yakoresheje metero zirenga 3.000 mu butumburuke mu gihe kitarenze umunota.

Imiryango y’abari bari muri iyo ndege aho bari ku kibuga cy’indege cya Supadio muri Pontianak, bategerezanyije agahinda amakuru ku bijanye n’iyo ndege

Umubare munini w’abatuye ikirwa cyegereye aho indege yaburiwe irengero babwiye BBC ko babonye ibintu bakeka ko byaba byavuye muri iyo ndege.

Minisiteri ishinzwe gutwara abantu n’ibintu, ivuga ko ibikorwa by’ubutabazi no kuyishakisha  bikomeje.

Bivugwa ko igihe baherukiraga kuvugana n’iyo ndege – hakoreshejwe ubutumwa SJY182 – hari saa munani n’iminota 40 z’amasaha yo muri Indonesia, ni ukuvuga ku isaha ya saa tatu n’iminota 40 za mu gitondo ku masaha yo mu Burundi no mu Rwanda.

Ubusanzwe, kugera mu gace ka Pontianak gaherereye mu burengera bw’ikirwa cya Borneo ni urugendo rw’isaha n’igice.

Nk’uko impapuro zibigaragaza, iyi ndege ni Boeing 737-500 yari imaze imyaka 26.

Sriwijaya Air, kompanyi itwara abantu mu ndege muri icyo gihugu, ivuga ko ikomeje gushaka amakuru ku bijanye n’iyo ndege.

Iyi ndege ya Boeing si ya yindi yo mu bwoko bwa 737 Max, yagize uruhare mu mpanuka ebyiri zikomeye mu myaka yashize.

Iya mbere muri zo uko ari ebyiri yabaye mu Kwakira 2018, yarimo indege ya Lion Air yo muri Indoneziya yaguye mu nyanja nyuma y’iminota 12 ihagurutse i Jakarta ihitana abantu 189.

Leave a Reply

Your email address will not be published. Required fields are marked *