Nyamagabe: Abarwaye Covid-19 baributswa kuguma mu ngo

Ubuzima

Umuyobozi bw’Akarere ka Nyamagabe, burahwitura abatuye aka karere ko bakwiye kongera imbaraga mu kwirinda icyorezo cya Covid-19, kuko kigihari kandi hari abakirwaye bugasaba abarwaye kuguma mu ngo.

Ubuyobozi bw’aka karere kandi bukomeza buvuga ko abatarwaye nabo bakwiye gukomeza kwirinda, bubahiriza amabwiriza atangwa n’inzego z’ubuzima.

Ubuyobozi bw’aka karere buvuga ko buri gushyira imbaraga mu bikorwa byo kurwanya Covid-19 harimo gushyira imbaraga mu kwimakaza isuku muri rusange ahahurira abantu benshi, hubakwa ubukarabiro ku mashuri, Ibigonderabuzima, kuri Gare n’ahandi.

Uwamahoro Bonaventure, Umuyobozi w’Akarere ka Nyamagabe, arahwitura abatuye aka karere ko bakwiye kongera imbaraga mu kwirinda icyorezo cya Covid-19, kuko kigihari.

Ati”Mu Karere icyorezo kiracyahari kandi hari abakirwaye. Ndasaba abarwaye kuguma mu ngo, abatarwaye bagakomeza kwirinda bubahiriza amabwiriza atangwa n’inzego z’ubuzima.”

Umurwayi wa mbere wa Covid-19 yagaragaye mu Rwanda ku wa 14 Werurwe 2020.

Kugeza ubu mu Rwanda umubare w’abamaze kwandura Covid-19 ni 21 309. Abamaze gukira ni 19 657, abakirwaye ni 1352 barimo batandatu(6) barembye.

Abamaze gukingirwa ni 348 926. Nta bantu bashya bakingiwe kuri uyu wa Gatanu.

Ibimenyetso bya Covid-19 birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Leave a Reply

Your email address will not be published. Required fields are marked *