Tanzania igiye kwakira inkingo za Covid no kujya itangaza uko ihagaze mu gihugu

Ubuzima

Tanzania igiye kwakira doze 300,000 z’inkingo za Covid-19 za porogaramu ya Covax igamije gufasha ibihugu bikennye kubona inkingo.

Minisitiri w’ubuzima Dr Dorothy Gwajima yavuze ko bateganya gutangira gukingira bahereye ku bakozi bo kwa muganga n’abandi bari imbere mu kurwana na Coronavirus.

Ati: “Dufite imibare mishya [y’abanduye Covid] ariko ntitwayitangaza buri munsi, turi kuyikusanya kandi twahisemo ko tuzajya tuyitangaza buri byumweru bibiri.”

Kuva Perezida Samia Suluhu yajya ku butegetsi, Tanzania yahinduye bigaragara imvugo n’imikorere imbere y’iki cyorezo, ugereranyije n’uwo yasimbuye John Pombe Magufuli.

Magufuli yategekaga amasengesho yo gusengera iki cyorezo, yarahagaritse gutangaza uko gihagaze kandi yaravuze ko iki gihugu kidakeneye inkingo za Covid.

Minisitiri Gwajima, ubu yagize ati: “Twujuje ibisabwa byose na Covax, dutegereje kwakira 20% by’inkingo z’ubuntu nyuma leta ikazategura imari yo kubona igice gisigaye.”

Dr Gwajima yongeyeho ko Tanzania izatangira gutangaza ku mugaragaro kuri internet amakuru ku cyorezo cya Covid-19 mu gihugu nk’uko ishami rya ONU ryita ku buzima ribisaba.

Ku makuru avuga ibura ry’ibikoresho (gas cylinders) bibika oxygen yo kwa muganga mu bitaro byo mu gihugu, yavuze ko aho byabaye byatewe n’abantu badakurikiza amabwiriza yo kwirinda Covid, imibare y’abayirwaye ikiyongera bityo ‘gas cylinders’ zigakenerwa cyane.

Mu byumweru bibiri bishize ni bwo Tanzania yatangaje abantu bashya 100 banduye Covid, hari hashize umwaka itavuga uko iki cyorezo cyifashe mu gihugu.

Src: BBC

Leave a Reply

Your email address will not be published. Required fields are marked *