U Bwongereza bwasubijwe muri Guma mu Rugo

Ubuzima

Leta y’u Bwongereza yafashe ingamba zo gusaba abaturage kuguma mu rugo, bitewe n’ikwirakwira ry’icyorezo cya Coronavirus riteye inkeke.

Izi ngamba zirareba igihugu cyose muri rusange, aho kuba uduce tumwe na tumwe nk’uko byari bisanzwe. Ni ubwa kabiri u Bwongereza bushyizwe muri gahunda ya Guma mu Rugo, kuko byaherukaga muri Werurwe umwaka ushize.

Inzego z’ubuzima mu Bwongereza zivuga ko iki cyemezo cyari ngombwa kuko imibare y’abandura icyorezo cya Coronavirus bajyanwa mu bitaro yiyongereyeho 40% ugereranyije n’uko byari bimeze muri Werurwe, ku buryo hari ubwoba ko ibitaro n’abakora mu nzego z’ubuzima bashobora kunanirwa kwita ku barwayi bose, yaba aba Coronavirus n’izindi ndwara.

Minisitiri w’Intebe w’u Bwongereza, Boris Johnson, yavuze ko “iminsi iri imbere izaba igoye kurushaho”, asaba Abongereza kwihangana kugira ngo bahashye iki cyorezo.

Abantu bazajya bemererwa gusohoka bagiye guhaha ndetse no gushaka serivisi z’ingenzi nk’iz’ubuzima. Abemerewe gusohoka kandi ni abantu bakora akazi katakorwa hifashishijwe ikoranabuhanga, mu gihe amashuri yasabwe gushyiraho ingamba zo gukomeza amasomo hifashishijwe ikoranabuhanga.

Johnson yahumurije Abongereza ababwira ko igihugu cye kiri gukora uko ibishoboka byose kugira ngo hakingirwe abantu benshi bashoboka, bave kuri miliyoni imaze gukingirwa ubu bazabe bageze kuri miliyoni 13 mu kwezi gutaha.

Kuri uyu wa Mbere u Bwongereza bwatangiye gutanga urukingo rwa AstraZeneca, aho bivugwa ko inkingo 500 000 zamaze gutegurwa kugira ngo zizatangwe mu gihugu hose.

Minisitiri w’Intebe Johnson yavuze ko abatuye mu bigo bibamo abakuze ndetse n’abakozi babo, abakora mu nzego z’ubuzima n’abasanzwe bafite izindi ndwara z’akarande, bazakingirwa mu gihe cya vuba, aho hari gutegurwa amabaruwa bazashyikirizwa abasaba kwikingiza.

Guma mu Rugo nshya mu Bwongereza iragirwa itegeko ku wa Gatatu, ikazagera rwagati mu kwezi gutaha. Izi ngamba zifashwe nyuma y’uko u Bwongereza bumaze iminsi irindwi yirukiranya buca agahigo ko kubona ubwandu bwinshi kuri buri nshuro, ndetse ni na ko byagenze mu ijoro ryakeye ubwo abantu 58,784 basanzwemo Coronavirus mu bipimo byafashwe, ari na wo mubare uri hejuru ubonetse kuva iki cyorezo cyatangira.

Minisitiri w’Intebe w’u Bwongereza, Boris Johnson, ubwo yasobanuraga ingamba nshya za Guma mu Rugo zizagirwa itegeko ku wa Gatatu

 

Leave a Reply

Your email address will not be published. Required fields are marked *