U Rwanda rugiye gushora miliyari 68 Frw mu buhinzi butifashisha ubutaka

Ubuhinzi

Leta y’u Rwanda ikeneye miliyari 68,5 Frw azashorwa mu buhinzi bwifashisha ikoranabuhanga mu myaka ibiri, mu kongera umusaruro no kurwanya indwara n’udukoko byibasira ibihingwa biturutse mu butaka.

Ni ubuhinzi buzwi nka “Hydroponic Farming” bwifashisha amazi n’ibinyabutabire hatagombye ubutaka.

The New Times yatangaje ko Minisiteri y’Ubuhinzi n’Ubworozi yamaze gutegura hegitari 38,1 zizakorerwaho uwo mushinga mu 2024.

Ni mu gihe iteganya no gushora miliyari 8,2 Frw mu bushakashatsi kuri wo, hubakwa inzu buzakorerwamo n’ibindi nkenerwa ndetse n’izihari ubu zikazaba zarajyanishijwe n’igihe mu 2024.

Umuyobozi Mukuru Wungirije ushinzwe Ubushakashatsi n’Ikoranabuhanga mu Kigo cy’Igihugu gishinzwe Itarambere ry’Ubuhinzi n’Ubworozi (RAB), Bucagu Charles, yavuze ko bugamije guteza imbere imbuto zidafite indwara n’umusaruro ufite agaciro gahambaye.

Ati “Turimo gukoresha ‘hydroponic’ dukora imbuto z’inyanya mu bushakashatsi kuri sitasiyo yacu iri mu Karere ka Musanze.”

Biteganyijwe ko imboga, imbuto, imyumbati n’ibijumba ari byo bihingwa bizashyirwa imbere muri ubwo buhinzi. Ibinyabutabire byifashishwamo ubu bituruka muri Kenya.

Bucagu yasobanuye ko ubwo buhinzi bugamije ubucuruzi, busaba ubumenyi bwimbitse ku ikoranabuhanga kandi bukeneye ubushakashatsi.

Yavuze ko kugira ngo uwo mushinga ugerweho bizasaba ko n’urwego rw’abikorera ruwugiramo uruhare, aboneraho guhishura ko Leta yiteguye gutera inkunga abazashaka gukorana nayo muri ubwo buhinzi.

Yakomeje ati “Abantu bashobora kwandika gahunda z’imishinga yabo bagatanga ubusabe, bakaba bahabwa amafaranga yo kuyikoresha bitewe n’uko yagira akamaro cyangwa ikenewe”.

Guverinoma irashaka kwibanda ku gufasha abikorera gushora imari mu buhinzi bw’imbuto n’imboga bizira udukoko n’indwara ziva mu butaka, ari nako hashyigikirwa iterambere ry’ikoranabuhanga muri bwo.

Bamwe mu batangiye gukora ubwo buhinzi batangaje ko umusaruro butanga uza wikubye inshuro nyinshi uboneka mu buryo busanzwe bwo guhinga mu butaka.

Sosiyete ya Eza Neza yatangiye kubukora kuva mu mpera za Ukuboza 2020 nyuma y’igerageza yari yaratangiye mu 2017. Ihinga inkeri, inyanya n’urusenda kuri metero kare 900 muri Muhanga.

Umwe mu bayitangije, Irakoze Christian, yavuze ko ubwo buhinzi bukoresha amazi n’ubutaka bike ku gipimo cya 80% ugereranyije n’ubusanzwe. Ni mu gihe umusaruro butanga wikuba inshuro ziri hagati y’umunani na 10 ugereranyije no guhinga mu butaka.

Yongeyeho ati “Dukeneye kugaragaza ko ubu buryo bukora kandi butanga umusaruro. Nibigenda bityo, buzashobora kureshya ishoramari kurushaho.”

Minisiteri y’Ubuhinzi n’Ubworozi yemeza ko gukoresha ubuhinzi nk’ubwo bishobora kuzamura umusaruro ukagera kuri Toni 500 kuri hegitari, uvuye kuri Toni 30 kuri hegitari.

 

Src: IGIHE

Leave a Reply

Your email address will not be published. Required fields are marked *