U Rwanda rugiye kongera gukingira Covid-19 mu gihugu hose

Ubuzima

Ministeri y’Ubuzima, kuri uyu wa gatanu taliki ya 28 Gicurasi, 2021 yatangaje ko u Rwanda rugiye kongera gukingira COVID19 mu gihugu hose, hagamijwe cyane cyane gutanga urukingo rushimangira ku bari bahawe urukingo rwa Oxford-AstraZeneca (Doze ya kabiri).

Nyuma y’igikorwa cyo gukingira Covid-19 cyabereye mu gihugu hose, kigasiga abagera ku 350 400 babonye inkingo, u Rwanda ruzongera gutanga inkingo za Covid-19 hagamijwe cyane cyane gutanga urukingo rushimangira ku bari bahawe urukingo rwa Oxford-AstraZeneca(Doze ya kabiri).

U Rwanda rwakiriye izindi doze za AstraZeneca zigera ku 247 000 binyuze mu bufatanye bw’ibihugu bugamije gukwirakwiza inkingo za Covid-19 ku isi, COVAX, izo doze Kandi zikaba zirimo izigera ku 117 600 zabonetse ku bufatanye na Guverinoma y’igihugu cy’Ubufaransa.

Dr Daniel Ngamije, Ministiri w’Ubuzima mu Rwanda, yavuze ko  biteguye guhita batangira gukingira bahereye ku bahawe urukingo rwa mbere rwa AstraZeneca.

Ati” Twishimiye cyane ubufatanye na Guverinoma y’igihugu cy’Ubufaransa ndetse n’abandi bafatanyabikorwa bacu bagize uruhare mu kuboneka kw’izi nkingo. Twiteguye guhita dutangira gukingira duhereye ku bahawe urukingo rwa mbere rwa AstraZeneca.”

Dr Ngamije, avuga ko kandi bakomeje ibiganiro n’abafatanyabikorwa kugira ngo n’izindi nkingo zikenewe ziboneke, bityo bakingire umubare munini w’abanyarwanda kuko ari bumwe mu buryo buzatuma dutsinda iki cyorezo.

Kuri uyu wa gatanu inkingo zose zakiriwe zinarara zigejejwe mu bigo nderabuzima hirya no hino mu gihugu, ku buryo gukingira bizatangira ejo ku wa Gatandatu taliki ya 29 Gicurasi, 2021.

Photo: (Internet)

Leave a Reply

Your email address will not be published. Required fields are marked *