U Rwanda rugiye kunguka Ikigo cy’Ubushakashatsi mu bya kanseri kiri mu bikomeye ku Isi

Ubuzima

Ikigo gikora ubushakashatsi, kikanatanga amasomo ku ndwara ya kanseri, IRCAD (Research Institute against Digestive Cancer) kiri kubaka Icyicaro cyacyo mu Rwanda, IRCAD Africa Center, kizaba ari cyo cyicaro cya mbere icyo kigo cyubatse ku Mugabane wa Afurika.

IRCAD ni Ikigo cy’Abafaransa kizobereye mu kubaga no kuvura kanseri hifashishijwe ikoranabuhanga, aho kiri mu bya mbere ku Isi mu kugira ubuhanga bwo kuvura indwara ya kanseri.

Mu 2018, Leta y’u Rwanda yagiranye amasezerano n’iki kigo yo gufungura icyicaro cyacyo mu Rwanda, ndetse mu mwaka wakurikiyeho imirimo yo kubaka Icyicaro Gikuru cy’icyo kigo kizaba kiri i Masaka mu Mujyi wa Kigali, yaratangiye ndetse kizatahwa uyu mwaka.

Nikimara gutangira imirimo mu buryo bwuzuye, Ikigo cya IRCAD Africa Center cyitezweho kuzaziba icyuho kigaragara ku Mugabane wa Afurika mu buvuzi bwa kanseri, yaba mu rwego rw’ubushakashatsi ndetse no mu rwego rwo guhugura abahanga mu kuvura kanseri.

Mu miterere yayo, kanseri ni indwara igoye kuvurwa kandi izahaza umubiri cyane, ku buryo ikeneye ubushakashatsi buhambaye mu rwego rwo kugira ngo yitabweho. Kimwe n’ahandi ku Isi, iyi ndwara iri kurushaho gukura ku Mugabane wa Afurika, aho imibare y’abicwa nayo yazamutse ku kigero cya 45% kuva mu mwaka wa 2000, kandi 70% by’abayirwaye ku Isi bakaba bari mu bihugu bikiri mu nzira y’amajyambere.

IRCAD Africa Center yitezweho gufasha mu guhangana n’iki kibazo binyuze mu bushakashatsi ndetse n’amahugurwa ari ku rwego rwo hejuru azatangira gutangirwa mu Rwanda muri uyu mwaka.

Iki kigo kandi cyatangiye gukorana n’abanyarwanda mu bushakashatsi mu by’ubuvuzi mu bya kanseri binyuze mu ikoranabuhanga, aho batoranywa muri Kaminuza y’u Rwanda, Carnegie Mellon University Africa (CMU-Africa) ndetse na African Institute for Mathematical Sciences (AIMS).

Igishushanyo mbonera cy’iki kigo ni uku kimeze

Visi Perezida wa IRCAD Africa, Dr. Guillaume Marescaux, aherutse kubwira The New Times ko icyemezo cyo gufungura ishami ryabo mu Rwanda cyaborohereye mu kugifata bitewe n’uburyo igihugu cyashyizeho gahunda zituma bashobora kugera ku ntego zabo, ndetse ko intego bafite zijyanye na gahunda y’igihugu mu buvuzi bugezweho.

Yaragize ati “Afrika yerekanye ko ishobora kuba isoko y’abahanga mu bya siyansi. Kugeza ubu, twashimishijwe n’abahanga twakoranye na bo mu Rwanda ndetse no ku Mugabane wa Afurika. Ni ibintu bishimishije kuko turi kubaka ikipe ya mbere ngari y’abahanga mu by’ubumenyi bw’ubukorano (AI) muri Afurika”.

Magingo aya, IRCAD Africa iri gushakisha no gukorana n’abandi bahanga mu ikorabuhanga ry’ubwenge bw’ubukorano, kugira ngo bahange udushya mu by’ikoranabuhanga dushobora kwifashishwa mu buvuzi bwa kanseri.

IRCAD Africa Center izaba iri mu Rwanda ni ishami rya IRCAD France, ari na cyo gihugu yatangiriyemo mu mwaka 1994, itangijwe n’umuhanga mu byo kuvura kanseri, Prof. Jacques Marescaux.

Iki kigo gifite inzobere mu byo kuvura kanseri zigera kuri 716, zitoza abaganga n’abandi bahanga mu byo kuvura kanseri bagera kuri 6200 buri mwaka, kigatanga amasomo 80, arimo 20 yo ku rwego rwo hejuru.

Uretse u Rwanda, IRCAD ifite ibyicaro mu bihugu bya Brazil, Taiwan, Lebanon ndetse n’ikindi kizashyirwa mu Bushinwa.

Igishushanyo mbonera cya IRCAD Africa kizaba kiri mu Rwanda
Imirimo y’iyubakwa ry’iki Kigo irarimbanyije
Iki Kigo kizaba gifite ahakorerwa ubushakashatsi mu kuvura kanseri
Nikamara kubakwa, iki kigo kizatanga amasomo ku buvuzi bwa kanseri ari ku rwego mpuzamahanga
Imirimo yo kubaka iki kigo igeze ahashimishije
Kizaba ari Ikigo gihuza intyoza mu buvuzi bwa kanseri ku rwego rwa Afurika
Imirimo yo kubaka ibikorwaremezo iri mu yemerewe gukomeza muri ibi bihe bya Guma mu Rugo

Inyubako z’iki Kigo zizarangira kubakwa muri uyu mwaka

Source: Igihe

Leave a Reply

Your email address will not be published. Required fields are marked *