U Rwanda rwakiriye doze 857,000 z’urukingo rwa Covid-19 rwo mu bwoko bwa Astra Zeneca

Ubuzima

Minisiteri y’Ubuzima mu Rwanda (Minisante), ku wa mbere taliki ya 04 Ukwakira, 2021 yatangaje ko U Rwanda rwakiriye doze 857,000 z’urukingo rwa Covid-19 rwo mu bwoko bwa Astra Zeneca.

Inkingo zakiriwe na Bwana Hassan Sibomana wari uhagarariye Minisitiri w’Ubuzima na Amb. Guillaume Kavaruganda Umuyobozi Mukuru ushinzwe Uburayi, Amerika n’imiryango mpuzamahanga muri Minisiteri y’Ububanyi n’Amahanga.

Guverinoma y’u Butaliyani yahaye u Rwanda doze ibihumbi 857 by’inkingo za Covid-19 zo mu bwoko bwa AstraZeneca, mu kurufasha gukomeza guhangana n’iki cyorezo kiri koreka imbaga hirya no hino ku Isi.

Izi nkingo zageze ku kibuga cy’indege cya Kigali kuri uyu wa 4 zizanywe n’indege ya Qatar Airways.

Izi nkingo zije ziyongera ku zindi ibihugu bitandukanye by’i Burayi na Leta Zunze Ubumwe za Amerika byageneye u Rwanda, muri gahunda ya Covax igamije guha inkingo ibihugu bikennye n’ibikiri mu nzira y’Amajyambere kugira ngo bitazasigara inyuma mu rugamba rwo kurandura burundu Covid-19.

Kugeza ubu mu Rwanda hamaze gukingirwa 2.131.766 bahawe doze ya mbere y’urukingo ndetse muri bo abarenga miliyoni n’ibihumbi 600 bahawe doze ebyiri.

U Rwanda rufite gahunda yo gukingira abarenga 60% mbere y’uko umwaka wa 2022 urangira, aho inkingo zimaze gutangwa mu Rwanda ari Pfizer-BioNTech na Astrazeneca ndetse hari n’iza Johnson & Johnson ruherutse kwakira mu ntangiriro za Nzeri.

Kuva muri Werurwe 2021 u Rwanda rwatangira gukingira, rumaze kwakira inkingo zirenga miliyoni 3,6 zabonetse muri gahunda ya Covax na AVAT (African Vaccine Acquisition Trust) yashyizweho na Komisiyo y’Umuryango wa Afurika yunze Ubumwe yo kugura no gukwirakwiza inkingo mu bihugu bigize uyu mugabane.

 

Photo: (Minisante)

 

Leave a Reply

Your email address will not be published. Required fields are marked *