Uganda: Urukiko rwategetse abasirikare kuva ku rugo rwa Bobi Wine

Politiki

Urukiko rukuru rwa Uganda rwategetse ko abasirikare n’abapolisi bava ku rugo rw’ukuriye ishyaka NUP ritavugarumwe n’ubutegetsi, Robert Kyagulanyi uzwi kandi nka Bobi Wine.

Bobi Wine n’umugore we bafungiye mu rugo rwabo kuva amatora ya tariki 14 z’uku kwezi yarangira.

Mu cyumweru gishize, abanyamategeko bahagarariye uyu munyamuziki wabaye umunyapolitiki batanze ikirego baregera urukiko gufungwa kwa Bobi Wine.

Abasirikare n’abapolisi bagose urugo rwa Bobi Wine kuva ku munsi wakurikiye amatora

Leta ivuga ko kumufungira iwe ari igikorwa cyari kigamije kumubuza gutegura imyigaragambyo yamagana ibyavuye mu matora, Bobi Wine avuga ko ayo matora yibwe.

Mu matora, Perezida Yoweri Museveni yatsindiye manda ya gatandatu n’amajwi hafi 59%, mu gihe Robert Kyagulanyi bari bahatanye cyane yagize hafi 35%.

Urukiko rukuru rwavuze ko gufungira Kyagulanyi iwe mu rugo “ari igikorwa kinyuranyije n’amategeko”.

Bobi Wine n’umugore we bafungiye mu rugo n’umwana bavuga ko yari yaje kubasura

 

Ntibizwi neza niba icyemezo cy’uru rukiko gihita gikurikizwa.

Ibihugu, imiryango yigenga n’abantu ku giti cyabo, banenze ko amatora muri Uganda yaranzwe no gupyinagaza no kwica abatavugarumwe n’ubutegetsi, bamagana n’ifungwa rya Bobi Wine iwe mu rugo.

Umuryango w’ubumwe bwa Africa wavuze ko amatora muri Uganda yagenze neza kandi yabaye mu mahoro asesuye.

Source: BBC

Leave a Reply

Your email address will not be published. Required fields are marked *